معلومات عن سوق البترول وإزاي السعر يوصل للسالب:
١- البترول وبقية السلع في البورصة بتتباع على الورق بالآجل مش فعليا براميل بتتحرك بين البايع والشاري.
٢- يعني مثلا أقدر اشتري عشرتلاف برميل تسليم مارس أو يونيو أو سبتمبر وهكذا. وقبل ما ييجي تاريخ التسليم أبيعهم بمكسب.
٣- الطريقة دي بتخلي المنتج يثبت سعر يعني يبيع أول السنة بسعر السوق ويخلي المستهلك برضه يبقى عارف هيشتري احتياجاته بكام طول السنة. مصنع بلاستيك مثلا ممكن يشتري في يناير كل احتياجاته طول السنة ويبقى ثبت سعره وبالتالي يبقى عارف هيبيع البلاستيك بكام طول السنة.
٤- نسبة كبيرة من الحركة بتكون بين مضاربين يعني يدخل يشتري العقد تسليم آخر السنة على أمل إن سعره يزيد أو يبيع للمستهلك على أمل إن لما المستهلك ده يحتاج البترول هيشتريله بسعر أرخص من إللي باعهوله بيه.
٥- العقود بتفضل تتباع وتتشرى بين الأطراف وهو ده إللي بيخلق السوق وبيطلع وينزل السعر حسب نوع الخام وميعاد التسليم.
٥- إللي حصل النهاردة إن عقود تسليم مايو هاتستحق في خلال أيام وماحدش محتاج بترول ولا فيه مكان تخزين لها. إللي معاه العقد ملزم يروح يستلم من المخزن علشان صاحب المخزن هيجيب بترول تاني متعاقد عليه.
٦- في الظروف العادية اللي محتاج البترول فعلا بيروح ينفذ العقد ويستلم لكن النهاردة ماحدش محتاج لان المخازن مليانة في كل مكان وبالعربي كدة إللي معاه عقد هيلبسه. في الأول بيحاول يبيعه بخسارة طيب بأي سعر طيب حتى يبيعه وفوقيه فلوس علشان ميضطرش يستلمه.
هي دي فكرة السعر السالب والخلاصة يعني إن الموضوع بسيط وهيعدي زي لما الطماطم تكتر في سوق الخضار وتقرب تبوظ هيقولك خدها بأي سعر أو حتى ببلاش علشان بس تتحمل نقلها بدل ما تبوظ عند التاجر. مش معنى كدة إن السوق الطماطم إنهار وكل منتجين الطماطم فلسوا. أول ما الطلب يزيد والنقل والصناعة يرجعوا المخازن هتفضى والبترول سعره هيبدأ يزيد.
ملحوظة: السعر السالب لخام معين (خام كندي وخام غرب تيكساس) لتسليم وقت معين (شهر مايو) مش كل البترول بقى بالسالب. خام برينت بـ٢٨ دولار تقريبا وغرب تيكساس نفسه تسليم أغسطس فوق العشرين دول
ليست هناك تعليقات:
إرسال تعليق